《值得咩？》
一中年土生土長的南亞裔男士，因2小時前胸口突然劇痛到急症室求診。
分流站護士著令職工為他做心電圖，供醫生先行判讀。
如果這時候心電圖有問題，便會馬上推入急救房。
然而，心電圖結果確定為無礙，叔叔10分鐘內獲高級醫生接見，並獲安排照X光和驗血，然後交由「下游」的小弟覆檢。
（警告：發音準確一點。）
「叔叔你叫甚麼名⋯⋯」我靠近發現是外籍人士後馬上轉麗音：「What's your name?」
對方以純正的廣東話答：「醫生我好痛呀，幫幫手。」
「咁你咩唔舒服？講嚟聽吓。」為表達我對他的尊重，我當然也用廣東話問症。
「我9點開始就心口拿住痛，痛到上膊頭呀下巴呀，係咁標冷汗又抖唔到氣，個人勁暈呀！」
如此典型的症狀，他自己一次過流利地說出來，我心想：嘩__，又中伏！
「你先躺上床！」我們把他扶上床後，手裡全是叔叔冒出來的冷汗。
雖然叔叔的第一張心電圖是正常的，但病情可能隨時有變，所以必須要給合病人的臨床表徵，才能準確判斷。
「再做一張心電圖吧？」機警的護士已經把心電圖機推過來了。
「當然！」
這時候的心電圖，比起半小時前的那一張已經起了變化，亦證實了我不祥的預感。
看著那張「下面扯晒旗」的心電圖，我隨即大喊：「三格推人R房，MI (心肌梗塞)！」
（註：「下面扯晒旗」即Inferior ST Elevation，別想歪喔！）
我們召了心臟科護士來會診，大伙兒在交代著情況，對方也決定立即為叔叔做「通波仔」手術，打通塞掉的心臟血管。
「醫生醫生。」叔叔他叫我。
「咩事？」
「我想去廁所呀！」
「你插咗尿喉，會覺得有少少急，不過會幫你放尿，唔使去廁所㗎。」
「唔係呀，我要開大呀！」
「咩話？」我、急症室護士和心臟科護士三人異口同聲說：
「唔！准！屙！」
「唔係呢！我真係想屙屎呀！好急呀！」
「唔得呀！你而加唔准屙屎呀！千祈唔好屙呀！」
醫護人員不讓病人大便，外人看似十分不人道，但對於心臟病發作的人來說，我們這樣做絕對是為他好。
本來心臟已經缺乏血液供氧，大便時用力，會影響到身體回流心臟的血液循環，使心肌梗塞的情況更差。
以前做實習醫生時，已經試過兩次有病人在半夜大便，誘發了心臟衰竭停頓，要從廁所裡拖出來做心外壓急救。
解決辦法是——先處理心臟問題，再以甘油條放大便——盡可能減少病人要用力的機會。
當我們把叔叔護送到心臟科手術檯上，快要開始通波仔時，叔叔再一次以純正廣東話問：「唔好意思呀咁多位，好快嫁咋！做之前我想去屙篤屎呀！」
在場全部同事再次異口同聲嚴厲地答：「唔、准、屙！」
為左篤屎，無左條命，值得咩？
—————
後記：
（6.5.2016 1:55pm）
大家都好緊張有無解釋到😂😂😂
雖然醫護界有句諺語話「無寫低即係無做過」（Not charted, not done），但係為左講故仔嘅節奏，唔會太長篇大論太悶，所以有啲細節會無寫到出嚟。
我地當然有同佢再解釋點解唔比啦！
最重要係千祈唔好「谷」或者「魯」大便，最易出事係用力屙落去果下，通常我們都會用藥，幫心臟病人保持大路暢通。
Search